Mag-anak niratrat, patay

Tatlong miyembro ng isang pamilya ang nasawi habang dalawa pa ang na­sugatan nang pagbabarilin ng 14 armadong kalala­ki­han sa Prosperidad, Agu­san del Sur nitong Biyernes ng umaga.

Kinilala ang mga nasa­wing biktima na sina En­berto Tequin, 54-anyos; Mi­sis nitong si Loreta, 42- anyos; at tatlong taong gulang na anak nitong si Jobert.

Ang mga nasugatan na nakilala namang sina Jane Maambong at isang alyas Balug Binamban ay isinu­god na sa DO Plaza Memorial Medical Center para malapatan ng lu­ nas.

Pinaslang ang mga biktima sa loob ng tahanan ng pamilya Tequin sa Purok 4, Brgy. La Purisima, Pros­peridad dakong alas-8:00 ng umaga.

Ayon sa imbestigasyon, bigla na lamang sumulpot sa lugar ang mga salarin na armado ng M 16 rifles at agad na pinagbabaril ang tahanan ng pamilya.

Sa inisyal na imbesti­gasyon, sinabi ni PO3 Ana Rose Lala ng Prosperidad Municipal Police Station na natukoy na nila ang lima sa mga suspek matapos ma­kilala ng mga kapitbahay ng mga biktima pero hindi muna maaring ihayag ang pagkakakilanlan dahil baka mabulilyaso ang kanilang dragnet operation. (Joy Cantos)