Napaaga ang salubong ni kamatayan laban sa dalawang batang lalaki makaraang makulong sa gumuhong tunnel na kanilang pinasukan habang umuulan sa Barangay Klobe, Lake Cebu, South Cotabato, kamakalawa.
Sa report ng Provincial Disaster Coordinating Council, kinilala ang mga biktimang sina Davino Kaling, 10; at Rolando Malandag, 9.
Ayon pa sa ulat, nawala ang dalawa noong Lunes ng hapon (Enero 19) habang malakas ang buhos ng ulan.
Base sa salaysay ng mga batang kalaro nina Davino at Rolando, pumasok ang dalawa sa hinukay na tunnel habang lumalakas ang ulan at hindi na lumabas pa dahil inabutan ng pagguho ng lupa.
Ayon sa mga opisyal ng PDCC, narekober ang bangkay ng dalawang bata kahapon ng umaga matapos humupa ang pag-ulan sa nasabing lugar.
Pinaiimbestigahan ng mga awtoridad ang may-ari ng tunnel dahil sa sinasabing walang permit mula sa kinauukulang ahensya ng pamahalaan. Joy Cantos