CAMP VICENTE LIM, Laguna — Rehas na bakal ang binagsakan ng isang apo ng comedy king na si Dolphy makaraang maaresto ng pulisya dahil sa pag-iingat ng baril na walang dokumento sa loob ng restaurant sa Barangay Poblacion 2 sa bayan ng Pagsanjan, Laguna kamakalawa ng gabi. Kinilala ng pulisya ang suspek na si Rodolfo Quizon III, 25, may asawa at residente ng Barangay Bagumbayan, Sta. Cruz, Laguna at anak ni Rodolfo Quizon Jr. na apo ni Dolphy. Sa police report, ang suspek ay nasakote ng mga tauhan ng Operation Bakal sa pamumuno ni P/Inspector Luis Perez, sa Poly’s Binalot & Videoke Bar dakong alas-10:30 ng gabi.
Hindi na nakapalag ang suspek matapos na makumpiskahan ng cal. 45 Colt MK4 na may isang magazine na naglalaman ng pitong bala.
Pansamantalang nakalaya si Quizon matapos magpiyansa ng P80,000. Arnell Ozaeta