105 mag-aaral nalason sa kendi

Umaabot sa 105 mag-aaral ang nalason maka­raang kumain ng sari-sa­ring uri ng kending konta­minado ng bacteria na itinapon sa tabing kalsada sa bayan ng Mankayan, Benguet noong Biyernes.

Sa ulat ni P/Senior Insp. Fernando Botangen, chief of police ng Man­ kayan, bandang alauna ng hapon nang mapulot ng mga batang mag-aaral mula sa Pallatong Elementary School at Mankayan Ele­mentary School, ang bulto ng mga kendi na pi­na­nini­walaang expired na.

Ayon kay Botangen, na aabot sa 11 sako ng kon­taminadong kendi  na ang ilan ay gawang lokal ha­bang ang iba pa ay may Chinese markings ang itinapon sa kahabaan ng Mankayan-Abatan Road.

Pinaniniwalaang ina­kala naman ng mga bik­tima na inihagis ni Santa Klaus ang mga kendi dahil mala­pit na ang Kapas­kuhan kaya pinulot ito at kinain.

Sa kasalukuyan ay ino­obserbahan pa rin sa Ben­guet Hospital ang 14 pa sa mga mag-aaral habang ang iba ay pinauwi na ka­hapon ng umaga matapos na mabigyan ng panguna­hing lunas. 

Samantala, dadalhin naman sa Bureau of Food And Drugs Central Office, ang samples ng ibang uri ng kendi upang maisaila­lim sa pagsusuri. Joy Cantos