Sinalo ng dalawang bata ang kamatayan matapos ang mga itong maipit sa away ng apat na guwardiyang nagbarilan sa isang palengke sa Roxas City, Capiz kamakalawa ng gabi.
Kinilala ng mga nasawing biktima na sina Jason Pelaez, 7-anyos, residente ng Barangay Lawaan sa naturang lungsod; at Nicole Soberano, 10 taong gulang.
Ang mga biktima ay kapwa nagtamo ng mga tama ng bala sa ulo at tagiliran na siya nilang ikinasawi
Nasugatan sa insidente sina Editha Soberano, 45 taong gulang; at Ariel Cerilo, isa sa mga guwardyang sangkot sa barilan.
Naganap ang insidente sa Roxas City Public Market nang magkrus ang landas ng naturang mga guwardiya dakong alas – 8:30 ng gabi.
Sa imbestigasyon, nagkainitan ang mga guwardiyang sina Cerilo, Ariston Eudela, Ricky Besana at Efren Diaz, pawang empleyado ng Teodoro Arcenas Trade Center, na nagresulta sa palitan nila ng putok sa palengke.
Sa gitna ng putukan, tinamaan ang guwardyang si Cerilo habang nadamay ang dalawang bata.
Sumuko naman sa mga awtoridad si Diaz matapos ang insidente habang patuloy pang tinutugis sina Eudela at Besana.