Kabesa, kagawad niratrat

CAVITE – Kasalukuyang nakikipaglaban kay kamatayan ang dalawang opisyal ng barangay na tumutulong sa proyektong pangkalinisan ng lokal na pamahalaan makaraang ratratin ng mga ‘di-pa kilalang lalaki na sakay ng motorsiklo sa panibagong karahasang naganap kamakalawa sa Barangay Dulong Bayan sa General Trias, Cavite. Kinilala ni P/Supt. Gregorio Evangelista, ang mga biktima na sina Brgy. Chairman Belcesar Arnecillo, 54; at Kagawad Leon Baczaz, 47, kapwa naninirahan sa nabanggit na barangay. Nagpapatuloy naman ang imbestigasyon ng pulisya. Cristina Timbang

Resort owner kinidnap

KIDAPAWAN CITY – Dinukot ng mga armadong kala­lakihan ang isang Filipino-Hispanic resort owner sa Barangay Kusiong sa Datu Odin Sinsuat, Shariff Kabungsuan noong Lunes ng umaga. Kinilala ang biktima na si Perfecto “Boyeh” Martinez, may-ari ng El Bimbo Resort sa Linek Beach sa Datu Odin Sinsuat may ilang kilometro ang layo sa Cotabato City. Sa phone interview, sinabi ni P/Supt. Esmael Pua Ali, provincial police director, hinarang ang sasakyan ng biktima sa bisi­nidad ng na­banggit na barangay. Ilang oras naman matapos na makidnap ang biktima ay narekober ang sasakyan nito sa  Barangay Interior, Datu Odin Sinsuat  na  siyang ginamit na geta­way vehi­cle ng mga kidnaper. Naganap ang pagdukot kay Martinez, ha­los dalawang linggo makaraang dukutin ang doktorang si Milagrosa Yap sa Cotabato City. Pero dahil sa maagap na pag­responde ng mga pulis, nabigo ang mga kidnapper na makuha si Yap.  Sa tala ng pulisya, ang nabangggit na lugar ay kilalang balwarte ng Pentagon kidnap-for-ransom gang na may ugnayan sa mga rebeldeng Muslim. Malu Manar at Joy Cantos