Naging mitsa ng kamatayan ng isang 62-anyos na lolo ang pag-aamok niya sa isang ospital nang sumabog ang hawak niyang eksplo sibo na ikinasugat din ng lima katao sa Iloilo City kamakalawa ng gabi.
Nagkagutay-gutay ang katawan at agad na nasawi ang biktimang si Evangelista Aposaga ng Project 7, Barangay Sooc, Arevalo ng nasabing lungsod.
Nasugatan naman sa insidente ang mga pasyente ng Western Visayas Regional Medical Center na sina Ramsdel Gallardo, Jennifer Sanpino, Antonio Adam, Ma. Nany Patrimonio at Carlos Magbanua.
Ayon sa imbestigasyon, lasing na nagtungo sa naturang pagamutan si Aposaga para bisitahin sana ang apo niyang babae na isa ring pasyente roon.
Pero hinarang siya ng mga guwardiya at pinigilang makapasok sa ospital dahil bawal sa loob ang mga lasing.
Galit na umalis ang matanda pero bumalik pagkaraang ng ilang oras sa pagamutan.
Nagalit ang matanda nang hindi pa rin siya papasukin ng mga guwardiya ng ospital. Natumba naman siya sa sobrang kalasingan bunsod upang sumambulat ang homemade explosive na agaran nitong ikinamatay habang nasugatan naman ang lima pang pasyente.
Narekober rin sa insidente ang isang homemade cal. 38 pistol ng matanda na may anim na bala.