Na-comatose ang isang 26-anyos na Tsinoy matapos na pagbarilin sa ulo ng mga ‘di-pa kilalang kalalakihan na puwersahang tumangay sa sasakyan nito sa Barangay San Matias, Guagua, Pampanga kamakalawa.
Kasalukuyang nakikipagbuno kay kamatayan sa Mother Teresa of Calcutta Hospital sa San Fernando City ang biktimang si Marvin Zita Chu ng Brgy. San Vicente sa bayan ng Sta. Rita, Pampanga.
Batay sa ulat ng pulisya na nakarating sa Camp Crame, bandang alas-11:30 ng gabi nang bumaba sa kaniyang kulay puting Ford Everest (XMD-253) ang biktima para bumili ng tinapay sa Artlits Bakeshop sa nasabing lugar nang lapitan ng mga suspek na pilit inaagaw ang dala nitong susi.
Akmang papalag ang biktima nang pagbabarilin sa ulo ng isa sa mga karnaper at kaagad na nagsitakas tangay ang Ford Everest patungo sa hindi pa malamang destinasyon. Joy Cantos