Kasalukuyang nakikipaglaban kay kamatayan ang isang 44-anyos na lalaki matapos itong pagbabarilin ng isang mister sa pag-aakalang aswang sa bayan ng Ivisan, Capiz kamakalawa ng gabi. Kasalukuyang isinasalba sa St. Anthony College Hospital ang biktimang si Rotio Balo na nagtamo ng mga tama ng bala ng baril sa katawan. Sa ulat na nakarating sa Camp Crame, bandang alas-10 ng gabi nang magtungo sa damuhan ang biktima habang hinihintay nito ang kaibigan na naiwan sa pag lalakad. Gayon pa man, isang mister na ‘di-tinukoy ang pagkakakilanlan ang naalimpungatan sa pagkakatulog at nang mapadungaw sa bintana ng kanyang bahay ay naaktuhan ang biktima na gumagapang sa damuhan. Sa pag-aakalang ito ang gumagalang aswang na usap-usapan at kinatatakutan sa kanilang bayan ay agad nitong kinuha ang nakatagong baril at ipinutok sa direksyon ng biktima. Joy Cantos