Pamilya nakuryente sa live wire

Dalawang miyembro ng isang pamilya ang namatay habang apat pa ang isinu­god sa pagamutan maka­raang aksidenteng makur­yente sa nakalaylay na live wire mula sa poste sa Ba­rangay Licsi, Manaoag, Pangasinan kahapon ng umaga.

Dead-on-the-spot ang biktimang si Salvador Dis­maya  Jr. at dead-on-arrival naman sa Region 1 Medical Center ang kapatid nitong si Ronald.

Nilalapatan ng lunas at idineklara nang nasa ligtas na kalagayan sa pagamu­tan ang iba pang mga biktimang sina Salvador Dismaya Sr., asawa nitong si Victoria, anak na si Christopher at pamangking si John John.

Bandang alas-7:00 ng umaga, nag-iigib ng tubig ang ina ng mga nasawi na si Victoria sa isang poso sa nasabing lugar nang big­lang matumba ang ginang.

Sa pag-aakala naman ng mister, anak at pamang­kin ng ginang na inatake ito sa puso ay patakbong su­maklolo ang dalawa nilang anak na bigla ring nagkiki­say at natumba sa insi­dente.

Nang lumapit si Salvador Sr. kasama ang isa pang anak at pamangkin ay nakaramdam sila ng kur­yente kung kayat hindi na lamang itinuloy ang pag­saklolo sa mga  ito.

Isinisisi ngayon ng pa­milya Dismaya ang pang­yayari sa Dagupan Electric Corporation dahil sa napu­tol  na kable ng kuryente dahil sa malakas na ulan at kidlat kamakalawa ng gabi sa bayan ng Manaoag at bunsod nito ay lumaylay sa paligid ng poso. (Joy Cantos)