Holdaper sinagupa ng kahera, todas

KIDAPAWAN CITY – Patay ang kahera ng isang sikat na tindahan sa Cotabato City nang makipagbuno ito sa isang holdaper alas-9 ng umaga kahapon.

Kinilala ni Chief Supt. Willie Dangane, hepe ng Cotabato City Police, ang nasawi na si Esterlita Agan, 34, kahera ng Center Point Grocery, isa sa pinakamalaking grocery center sa lungsod.

Ayon sa report, papasok na ng bangko si Agan para magde­posito ng kinita ng grocery center nila nang biglang hablutin ng ‘di kilalang holdaper ang hawak niya’ng bag.

Pero nakipagbuno si Agan sa kawatan kaya siya nabaril ng kasama ng suspek gamit ang caliber .45 pistol.

Sa likod ang tama nito na naging dahilan ng agaran nitong kamatayan.  

Ang pinangyarihan ng krimen ay 50 metro lang ang layo mula sa istasyon ng PNP. Gayunman, nabigo pa rin ang mga pulis na madakip ang mga suspek. (Malu Cadelina Manar)