QUEZON – Tatlong kalalakihan na pinaniniwalaang mga kidnaper ang naaresto ng mga alagad ng batas makaraang mailigtas ang isang 10-anyos na batang lalaki sa isinagawang follow-up operation sa Barangay Poblacion sa bayan ng Macalelon, Quezon kamakalawa.
Sumasailalim sa interrogation ang mga suspek na sina Pedro Gadi, Ricardo Gutierrez at Elmer Santos na pawang naninirahan sa bayan ng Macabebe, Pampanga.
Sa inisyal na ulat ng pulisya, naglalaro sa harapan ng kanilang bahay ang biktimang itinago sa pangalang Jason, 10, nang lapitan at tangkang isakay sa van ng tatlo ang bata.
Nagkataon namang may nakasaksi sa insidente kaya naipagbigay-alam kaagad sa pulisya hanggang sa makorner ang mga suspek sa nasabing barangay at nailigtas naman ang bata. Inatasan na ni P/Senior Supt. Hernando Zafra, ang mga hepe ng pulisya sa 39-bayan at 2-lungsod sa Quezon kung may basehan nga ang naglalabasang ulat na may grupong nangingidnap ng mga bata at ipinagbibili sa mga dayuhang banyaga. (Tony Sandoval)