Minahan, military detach sinunog ng NPA rebs

Sinalakay saka sinunog ng mga rebeldeng New People’s Army (NPA) ang isang minahan at military detachment  sa magka­hiwalay na insidente ng karahasan sa bayan ng Tampukan, South Cota­bato kahapon ng mada­ling-araw.

Base sa ulat na isi­numite sa Camp Crame, sa kasagsagan ng pag­salubong sa Bagong Taon nang lusubin ng mga rebeldeng kasapi ng NPA Front Committee 76 ang  Saguittarius Mining Inc. sa Barangay Tablu, Tam­pukan.

Agad na sinunog ng mga rebelde ang tatlong gusali ng nasabing mi­nahan at isinunod naman na salakayin at sunugin ang detachment ng militar sa nasabi ring barangay.

Walang nagawa ang mga security forces  sa naganap na pagsalakay ng NPA  makaraang bi­hagin ang kanilang chief security.

Pinakawalan rin  ng mga rebelde ang nasabing security chief  bago ma­bilis na nagsitakas pa­tungo sa direksyon ng pi­nagkukutaan ng mga ito sa kabundukan.

Nabatid na ang sina­lakay na minahan ay isa sa  may pinakamalaking depo­sito  ng copper sa Asya.

Ang insidente ay sa kabila ng  inoobserbahang huling mga araw ng ceasefire na idineklara ng NPA mula Disyembre 31 hanggang kahapon. (Joy Cantos)