Bus pisak sa acacia: 12 patay

CAMARINES NORTE – Inihabol pa ni kamatayan sa pag­sapit ng Undas ang labindalawang miyem­bro ng religious group habang sampu naman ang malubhang nasu­gatan makaraang ma­bagsakan ng acacia ang pampasaherong bus na sinasakyan ng mga biktima sa bahagi ang Purok 1, Barangay Laniton, Basud, Cama­rines Norte kahapon ng umaga.

Kabilang sa mga biktimang namatay sa Camarines Norte Provincial Hospital at Leon Hernandez Memorial Hospital ay sina Es­trella Odi, Estrella Ebo­ña, Gracita Clotario, Sonny Medina, Mary Rose Bismonte, Nenita Vibal, Leonel Avilado, Carmelia Babagay, Ryan Babagay, Re­malyn Dasco, Jaclyn Mae Franco at Medina Franco pawang mga miyembro ng religious group na Ave Maria Fondation.

Sugatan naman sina Noel Baniano, 33, drayber ng Eddie Bus Transit (EVV 212); Rogelio Medina, kon­duktor; Alorane Balte, 14; Diane Abrera, 13; Rjay Vibal, 14; Justine Angelica Gutierez, Ademar Calajate, Ro­nald Mago, Kay Asiao, at si Julie Ann Diño.

Sa panayam ng PSN sa nakasaksing si Edwin Fernandez, unti-unting bumabag­sak ang acacia na may 20-taon nang nakatayo sa kanilang bakuran na unang nakaiwas sa naka­ambang panganib ay isang kotse.

Subalit, hindi na­pansin ng drayber ang pabagsak ng acacia, kaya napisak ang ka­lahati ng bus at na­damay ang mga bik­timang papauwi na sana mula sa dina­luhang pagpupulong sa Naga City.

Kaagad naman ru­mesponde ang grupo ng Civilian Armed Forces Geographical Unit ng 22nd Infantry Ba­tallion ng Philippine Army at mga pulis-Basud sa pamumuno ni P/Insp. Antonio Lac­son.