1.5 toneladang ‘hot meat’ nasabat

GUIGUINTO, Bula­can – Rehas na bakal ang binagsakan ng lima-katao kabilang ang isang ka­wani ng munisipyo na nagtangkang suhulan ang pulis matapos ma­sakote dahil sa pagka­kakum­piska ng 1.5 tone­ladang botyang karne ng baboy noong Huwebes ng gabi.

Kinilala ni Supt. Ro­nald De Jesus, hepe ng pulisya ng Guiguinto, ang mga suspek na sina Ricky Bacsal, Teresa Palomar, Arnel Alvarez at Joel Tan.

Napag-alamang pag-aari ng magka-live-in sina Bacsal at Palomar ang nakumpiskang bot­yang karneng baboy, habang inaresto din ng pulisya si Gregorio Car­denas, isang kawani ng muni­sipyo ng Guiguinto matapos suhu­lan ng P35,000 ang mga pulis.

Napag-alamang lulan ng kulay pulang  XLT closed van (CLL-471) ang nasabing kontra­bando nang dumaan sa PNP checkpoint sa Ba­rangay Pritil bandang alas-9:30 ng gabi noong Huwebes.

Nang inspeksyunin at dadalhin na sa Hiyas Agro-Commodities Center (HACC) slaughter house sa Barangay Ta­bang para sunugin ang karne ay dumating na­man si Cardenas at ti­nang­kang iabot ang na­sabing halaga kina SPO4 Art Gatmaitan at PO3 Darly Riogleon na nag­ sumbong kay de Jesus sa tangkang panunuhol.

Kaagad namang ipi­na­aresto ni de Jesus, si Car­­­denas, samantalang sinertipikahan ni Dr. Ed Jose, ang Municipal Agri­culture­ Officer ng Gui­guinto na double-dead nga ang mga na­kum­piskang karne.

Bukod sa mga kar­neng idi-deliver sana sa Maynila, nakakumpiska rin ang pulisya ng electric­ mixer, mga kutsilyo at electronic weighing scale mula sa mga suspek kaya’t hinihinalang gaga­wing longganiza at tocino ang karne. (Dino Balabo at Boy Cruz)