60 karnap na motorsiklo at traysikel nasamsam

KIDAPAWAN CITY  — Aabot sa 60 motorsiklo at tray­sikel na  pinaniniwala­ang ki­narnap ang nakum­piska ng mga tauhan ng North Cota­bato PNP, Anti-Terror Cota­bato Rapid Res­ponse Group at ng Land Transportation Office sa isinagawang Oplan Bitag Sasakyan‚ sa kahabaan ng  highway  na  sakop ng Pi­kit, North Cotabato, noong Biyernes.

Sa ulat ni P/Insp. Joyce Birrey, spokesman ng North Cotabato PNP, karamihan sa mga sasakyan na na-impound ay binago ang mga numero ng makina at chassis.

Ito ang ikalawang “Oplan Bitag Sasakyan”‚ na isina­gawa ng mga pulisya sa ka­habaan ng highway ng North Cotabato simula no­ong Hulyo 2007.  

Gayon pa man, aabot naman sa 78 sasakyang un­documented at binago ang numero ng makina ang na­kumpiska ng mga ope­ratiba ng North Cotabato PNP at ng CRRG sa mga bayan ng Carmen at Kaba­can sa North Cotabato.

Kasalukuyang naka-im­pound ang mga nakum­pis­kang sasakyan sa head­quarters ng 1201st Mobile Group ng North Cotabato PNP.

Nabatid na ang Ba­rangay Raja Muda, dating kampo ng Moro Islamic Liberation Front sa bayan ng Pikit, ay sina­sabing ta­guan ngayon ng mga kar­nap na motorsiklo at tray­sikel sa North Cotabato, ayon na rin sa isang mataas na opisyal ng North Cota­bato PNP. Malu Cadelina Manar