Kasalukuyang sumasailalim sa tactical interrogation ang mga suspek na sina P/Insp. Rex Infante, alyas Bong, 29, nakadestino sa Bureau of Immigration and Deportation (BID); Vincent Goloran, 29, ex-BID agent, ng Sta. Mesa Heights, Quezon City; at Dennis Balbin, 39, civilian agent ng PSG, ng Kingstown II, Subd. Bagombong, Caloocan City.
Ang mga suspek ay nahaharap sa kasong 4 counts ng kidnapping matapos na dukutin at ipatubos sa kanilang pamilya ang mga biktimang sina Harvinder Singh, 35; Jaskaran Singh, Jaswinder Singh, 25; at Sandeep Singh, 22.
Ayon kay P/Supt. Reymundo Oliquiano, hepe ng pulisya sa nabanggit na bayan, ang mga suspek ay lulan ng Toyota Revo (XAR-326) at Mitsubishi Lancer (WAV-833) nang maispatan ng pulisya na sakay din ang dalawang biktimang sina Harvinder at Jaskaran na tangkang ipatubos sa kanilang pamilya matapos na dukutin.
Napag-alamang habang iniimbestigahan sa himpilan ng pulisya sa bayan ng Binangonan sina Goloran at Balbin ay lumutang si P/Insp. Infante para ayusin ang kaso ng dalawang suspek, subalit namukhaan ito ng dalawa pang biktima na sina Jaswinder at Sandeep na siyang kumidnap sa kanila noong Abril 6. (Edwin Balasa)