Mister dinedo dahil sa mikropono

QUEZON – Isang 34-anyos na mister ang kumpirmadong nasawi makaraang barilin ng isa sa tatlong kalalakihan na nakaalitan ng biktima dahil sa mikropono sa loob ng videoke bar sa Barangay 3 sa bayan ng Alabat, Quezon, kamakalawa.

Sapol sa ulo ng bala ng baril ang biktimang si Jaime de Leon ng Barangay Villa Jesus Jueste ng bayang nabanggit. Samantala, tugis naman ng pulisya ang mga suspek na sina Rene Malabunga, Don-don Caparros at Neil Cabangon.

Sa imbestigasyon ni PO2 Rico Feronal, dakong alas-9:45 ng gabi nang magkasagutan ang biktima at grupo ng suspek dahil sa pag-aagawan sa mikropono.

Napag-alamang nagpaligsahan sa kantahan ang dalawang panig nang magtalo sa mikropono dahil giniit ng biktima na siya ang muling kumanta.

Nagalit ang isa sa mga suspek kaya bumunot ng baril at pinaputukan sa ulo ang biktima na hawak pa ang mikropono nang bumulagta sa sahig. (Tony Sandoval)