Globe cellsite pinasabog uli

QUEZON — Pinasabog at sinunog ng mga hinihinalang miyembro ng New People’s Army (NPA) ang isa na namang cellsite ng Globe Telecommunications Company matapos na sumalakay ang mga ito at tinangay pa ang isang pulis na kanilang nasabat sa NPA checkpoint kahapon ng umaga sa bayan ng Lucban, ng lalawigang ito.

Batay sa ulat ng pulisya, dakong alas-6:15 ng umaga nang pasukin ng may humigit kumulang sa 50 armadong lalaki na pawang naka-fatigue uniform ang Globe cellsite na nakatayo sa Lucban dahil na rin sa galit ng grupo dahil sa hindi umano pagbabayad ng hinihinging revolutionary tax ng pamunuan ng nasabing kumpanya.

Ayon kay P/Insp. Henry Uhagan, chief of police ng Lucban, bandang alas-6:30 ng umaga nang disarmahan ang nag-iisang security guard ng mga rebelde bago tinaniman ng mga pampasabog ang machine room, generator at ang paanan ng tower. Bagaman isang malakas na pagsabog ang narinig pero hindi umano nasira ng matindi ang naturang istraktura. Wala rin naiulat na nasaktan sa pagsabog. Naglagay ng NPA checkpoint at tiyempong dumaan si PO3 Leo Madrigal na sakay ng jeep kaya siya isinama sa kanilang pagtakas. (Tony Sandoval/Arnell Ozaeta)