Computer shop nilooban

IBA, Zambales – Tinatayang umaabot sa kalahating milyong piso ng mahahalagang kagamitan ang tinangay ng mga hinihinalang "Akyat Bahay" gang makaraang pasukin ng mga ito ang isang computer shop sa Brgy. VI, ng bayang ito kamakalawa.

Ayon sa pulisya, bukod sa 14 piraso ng central processing units (CPU), natangay din ang isang uninterrupted power supply (UPS) at ibang mahahalagang kasangkapan sa Cyber Bits Computer Shop na pag-aari ng mag-asawang sina Valentino Jorge Fabros at Jocelyn Fabros.

Sinabi ni Sr. Insp. Remegio Magno, hepe ng Iba Police Office na nakapasok ang mga suspek sa computer shop sa pamamagitan ng pagsira ng pitong kandado nito gamit ang bolt cutter. (Fred Lovino)