Nobya tinodas, nobyo nag-suicide

CAMP CRAME – Pinaniniwalaang naburyong ang isang binata matapos na paslangin muna ang kanyang nakipagkalas na nobya at ikinasawi rin ng kaibigan ng dalaga bago ito nag-suicide sa Davao City, kamakalawa.

Batay sa ulat, ang bangkay ng suspek sa pamamaslang na si Mario "Mayo" Balen, ay natagpuang nakabitin sa punong kahoy sa Brgy. Tayapoc, Peñaplata District, Samal ng lungsod na ito.

Ang pagpapatiwakal ni Balen ay nadiskubre ilang oras matapos nitong pagbabarilin at mapatay sa inuupahang boarding house ang kanyang nobya na si Ma. Cristina Ligal, 23, ng Mangagoy, Bislig City sa Surigao del Sur at nadamay naman sa insidente ang matalik na kaibigan ng dalaga na si Rowena Roda, 23, ng Cotabato City.

Nabatid, na bandang alas-12:10 ng tanghali nang pasukin ni Balen sa boarding house ang kanyang girlfriend sa Jamero Compound sa 478 Alley, Malvar St., Davao City.

Kasalukuyang nagre-review ang dalawang magkaibigan para sa nalalapit na nursing board examination nang pagbabarilin ng suspek.

Mabilis na tumakas ang suspek, subali’t nasaksihan ng ilang boarders at ng caretaker ng boarding house ang naganap na krimen.

Lumilitaw pa sa imbestigasyon, na si Ligal na nakatakda nang magtungo sa ibang bansa ay nagdesisyong makipagkalas sa kanyang nobyo dahilan sa sobrang pagkaseloso nito. (Ulat ni Joy Cantos)