Kolumnista ng tabloid binoga

MARILAO, Bulacan – Kasalukuyang nakikipaglaban kay kamatayan ang isang 39-anyos na kolumnista ng lokal na tabloid makaraang barilin sa mukha ng dalawang armadong lalaki habang ang biktima ay naghihintay ng sasakyan sa Barangay Tabing-Ilog sa bayang ito kamakalawa ng gabi. Inoobserbahan sa Jose Reyes Memorial Hospital ang biktimang si Aliver Demaala ng T. Leon St., Karuhatan, Valenzuela, samantalang ang mga suspek na nakilala sa alyas na Jun at Mando ay agad na tumakas sakay ng motorsiklo. May teorya ang pulisya na may kaugnayan ang krimen sa pagbubulgar ng biktima sa sinusulatang tabloid laban sa talamak na pasugalan. (Ulat ni Efren Alcantara)