Idineklarang patay sa Cebu City Medical Center si Michael Capacite, working student at namamasukan bilang sakristan sa Basilica Minore del Sto. Niño.
Agad naman sumuko sa himpilan ng pulisya si Ricardo Talisic matapos na makilalang sakristan si Capacite na nakatakip sa mukha ng t-shirt.
Napag-alaman sa imbestigasyon ng pulisya na isinumite sa Camp Crame, nagroronda sa paligid ng simbahan si Talisic nang makarinig at maramdaman nitong may kaluskos na likha sa loob ng binabantayang lugar.
Dahil dito ay dahan-dahang nilapitan ni Talisic ang kinaroroonan ng sakristan na noo’y nililimas ang malaking halaga na nakapaloob sa donation box.
Naramdaman naman ni Capacite ang paglapit ni Talisic kaya tinangka nitong agawin ang hawak na baril hanggang sa magpambuno ang dalawa.
Sa hindi inaasahang pagkakataon ay biglang pumutok ang pinag-aagawang baril na nagresulta para tamaan sa kanang kilay si Capacite na nakatakip pa ang mukha.
Ayon pa sa ulat, nang tanggalin ni Talisic ang t-shirt sa mukha nang nakalaban ay natuklasang isa pala sa kanilang mga sakristan ang nakapambunong si Capacite.(Ulat ni Joy Cantos)