Lider ng pyramid scam nadakip

Bumagsak sa mga ahente ng National Bureau of Investigation (NBI) ang lider ng isang big time pyramiding syndicate na responsable sa pagtangay ng mahigit P211 M sa kanilang mga investors sa isinagawang operasyon kahapon ng umaga sa Antipolo City.

Iniharap ni NBI Director Reynaldo Wycoco ang nadakip na suspek na si Palmy Tibayan, 38, isa sa may-ari ng Tibayan Group Investment Co. Inc. at residente ng Brgy, Bagong Nayon, Cogeo Village ng nasabing lungsod.

Pinaghahanap naman ang asawa nito na si Jesus Tibayan at mga kasabwat na sina Ezekiel Martinez, Liborio Elacio, Jimmy at Nilda Baran.

Ayon kay Wycoco ang suspek ay nasakote matapos ang may isang linggong surveillance operations na kanilang isinagawa base sa mga reklamong natanggap nila laban dito.

Nabatid sa opisyal na ang suspek ay nakapanloko ng may 495 investors at nagkamal ng kabuuang P 211, 356 mula sa mga ito. Ang suspek ay nahaharap ngayon sa kasong paglabag sa Article 315 o syndicated estafa. (Ulat ni Danilo Garcia)