Trike vs jeep: 2 patay

PAMPANGA – Dalawa-katao ang iniulat na nasawi, samantala, isa naman ang nasa kritikal na kondisyon makaraang salpukin ang traysikel na sinasakyan ng mga biktima ng dyip sa Barangay San Nicolas, Magalang, Pampanga kamakalawa ng umaga.

Hindi na umabot pa ng buhay sa Balitucan District Hospital ang mga biktimang sina Sonny Lansang at Mark Pineda na kapwa residente ng Bagong Bayan Subdivision, Angeles City, samantala, si Sim Lansang na driver ng traysikel na may plakang CS4310 ay inoobserbahan sa nasabing ospital.

Base sa ulat ng pulisya, biglang nag-overtake ang traysikel sa dyip na may plakang CNW-713 pero sumabit sa kaliwang bumper kaya nabangga saka tumilapon ng may ilang metro. (Ulat ni Pesie Miñoza)