Tsinoy tiklo sa 1 kilo ng shabu

CAMP CRAME – Isang Filipino-Chinese sawmill supervisor ang naaresto ng mga tauhan ng Philippine Drug Enforcement Agency (PDEA) sa isinagawang buy-bust operations kung saan ay isang kilo ng shabu ang nakumpiska dito sa Bulacan.

Kinilala ni PDEA director Anselmo Avenido ang nadakip na suspect na si Willy Ko, 34, may-asawa at nakatira sa no. 3 Watput St., 4 Kings Townhomes, Abangan Sur, Marilao.

Ayon sa ulat, dakong alas-3 ng madaling-araw ng bumili ng 1 gramo ng shabu ang ahente ng PDEA kay Ko sa kanto ng M. Jacinto St., Paco, Obando.

Nagmayabang umano ang Fil-Chinese na kaya nitong magbenta kahit 1 kilo ng shabu na agad namang nagpakita ng interes ang ahente hanggang sa ilabas ni Ko ang droga mula sa kanyang motorsiklo kaya dinakma agad ito.

Napag-alaman na matagal na umanong sinusubaybayan ng mga awtoridad ang kilos ni Ko na pinaniniwalaang bigtime shabu trafficker sa Bulacan. (Ulat ni Danilo Garcia)