Misis ni-rape, pinatay sa harap ng anak

CAMALIG, Albay – Pinaniniwalaang pinasukan ng masamang espiritu ang isang 30-anyos na lalaki kaya nagawa nito ang maitim na balak at patayin pa ang kanyang kapitbahay na misis sa harap ng sariling anak ng biktima sa Barangay Libod sa bayang ito kahapon ng madaling-araw.

Animo’y tinadtad na karne ng hayop ang katawan ng biktimang si Maribel Magdamit, 28, may-asawa, samantala, ang suspek na nadakip sa bayan ng Daraga, Albay sa isinagawang follow-up operation ay nakilalang si Agustin Llorag Jr., 30, may-asawa at kapitbahay ng biktima sa nabanggit na barangay.

Napag-alaman sa pagsisiyasat ng pulisya na isinagawa ang krimen dakong alas-3 ng madaling-araw sa sariling bahay ng biktima at mismong sa harap ng anak na si Edwin Magdamit Jr., anim na taong gulang na nagtago lamang sa ilalim ng kanilang kama upang hindi makita ng suspek.

Nabatid pa sa ulat ng pulisya na kasalukuyang natutulog ang biktima nang pasukin sa loob ng kuwarto at nasaksihan ng bata na matapos isagawa ang maitim na balak ay kinaladkad papalabas ang kanyang ina saka pinagtataga ng itak sa iba’t ibang bahagi ng katawan.

Natagpuan lamang ang bangkay ng biktima ng kanyang mister bandang alas-5:30 ng umaga may limang metro lamang ang layo mula sa kanilang bahay matapos na manggaling sa trabaho.

Nadakip naman ang suspek dakong alas-8 ng umaga sa nabanggit na bayan habang naghihintay ng masasakyan patungong Maynila.

May palagay ang pulisya na matagal na binalak ng suspek na isagawa ang krimen ngunit kahapon lamang nakatiyempo dahil na rin sa masamang pagnanasa laban sa biktima. (Ulat ni Ed Casulla)