Sulyap Balita

Retarded hinalay sa waiting shed

BACOOR, Cavite – Isang 26-anyos na babaeng may kapansanan sa pag-iisip ang iniulat na naaktuhang hinalay ng obrero sa waiting shed na sakop ng Barangay Kaingin sa bayang ito kamakalawa ng gabi.

Ang biktimang itinago sa pangalang Weng ay residente ng Barangay Habay Uno, samantala, ang suspek na ngayon ay nakakulong sa police detention cell ay nakilalang si Jasoher David, 25, may asawa ng Pulido Compound, Barangay. Panapaan sa bayang ito.

Ayon kay SPO1 Rodolfo Arboleda, naaktuhan ng kapatid ng biktima ang suspek dakong alas-10:30 ng gabi kaya mabilis na naipagbigay -alam sa mga barangay opisyal at inaresto si David. (Ulat ni Cristina Go-Timbang)

2 NPA itinumba ng sundalo

CAMP AGUINALDO – Dalawang rebeldeng New People’s Army (NPA) na pinaniniwalaang nangongolekta ng revolutionary tax sa mga residente ang kumpirmadong napatay ng sundalong nagsasagawa ng intelligence mission sa Sitio Dapdap, Barangay Tagum, Sta. Cruz, Marinduque kamakalawa ng gabi.

Armado ng itak at patalim ang dalawang rebeldeng sina Michael dela Cruz ng Tagkawayan, Quezon at Israel Radelas ng Villarica ng General Luna, Quezon, samantala, ang sundalong nakapatay sa dalawa ay nakilalang si Pfc. Hector Amandy ng 74th Infantry Battalion ng Phil. Army.

Sa ulat na nakarating kahapon sa Camp Aguinaldo, naganap ang pangyayari dakong alas-4 ng hapon makaraang lapitan ng mga rebelde si Amandy ngunit nakatunog na may nakaambang panganib kaya inunahan na nito ang dalawa. (Ulat ni Danilo Garcia)

Mag-ina malubha sa pamamaril ng Aleman

LUCENA CITY, Quezon – Dahil sa pagpapausok ng pinatuyong dahon ng punong kahoy ay nagawang pagbabarilin at malubhang nasugatan ang mag-ina ng Aleman na pinaniniwalaang may allergy sa usok sa Brgy. Bocohan sa lungsod na ito kamakalawa ng hapon.

Kasalukuyang nakikipaglaban kay kamatayan ang mag-inang sina Yolanda, 36 at Mark Anthony Olases, 7, samantala, ang suspek na ngayon ay tinutugis ng pulisya ay nakilalang si Alfred Shielman, 49 ng Ciudad Maharlika Subdivision ng nabanggit na barangay.

Base sa pagsisiyasat ni PO3 Raul Avilla, naganap ang krimen bandang alas-4 ng hapon matapos mamataan ng suspek na nagsisiga ang mag-ina kaya bumaba sa kanyang kotse at pinagbabaril ang mga biktima na pinalalagay na madaling magalit kapag nakakakita ng usok. (Ulat ni Tony Sandoval)

Mister inutas dahil sa pagtawa

TAYTAY, Rizal – Naging ugat ng kamatayan ng isang 35-anyos na mister na pakutyang pagtawa sa nadapang senglot na lalaki makaraang saksakin ng kasama ng nadapa ang biktima kamakalawa ng gabi sa panulukan ng Barangay San Isidro sa bayang ito.

Idineklarang patay sa ospital ang biktimang si Julian Peñaflor ng Sitio Sinoma, Barangay San Isidro, Taytay, Rizal, samantala, ang suspek na mabilis namang tumakas ay nakilalang si Reggie Valejo, 23 ng Block 35 Lot 18 ng nabanggit na barangay.

Sa imbestigasyon ni PO2 Manuelito Inosanto, naitala ang krimen bandang alas-8 ng gabi matapos madapa ang senglot na pasuray-suray na kasama ng suspek at dahil sa nakita ng biktima ay pinagtawanan na kinairita naman ni Valejo kaya isinagawa ang krimen. (Ulat ni Joy Cantos)

Kotse vs dyip: 2 katao dedo

VICTORIA, Laguna – Maagang binawian ng buhay ang isang 42-anyos na doktor at kaibigan nito makaraang sumalpok sa kasalubong na pampasaherong dyip sa kahabaan ng national highway na sakop ng Barangay Masapang sa bayang ito kahapon ng umaga.

Kaagad na namatay sa pinangyarihan ng aksidente sina Dr. Nelson Cahimat at kaibigan nitong si Camilio Pacheco, 50 na kapwa residente ng Pakil, Laguna, samantala, sugatan naman ang asawa ng drayber ng dyip (DVD-789) na si Rosario dela Torre.

Naitala ang pangyayari dakong alas-6:20 ng umaga makaraang mawalan ng kontrol ang minamanehong Honda Civic (WJW-354) ni Cahimat mula sa Cavite patungong Laguna.

Nahirapan ang mga rescue worker na ilabas ang mga biktima sa wasak na kotse na animo’y niyuping lata ng sardinas. (Ulat ni Ed Amoroso)