Sulyap Balita

4 NPA rebels nasakote

CAMP AGUINALDO – Apat na kalalakihan na pinaniniwalaang kasapi ng rebeldeng New People’s Army (NPA) ang iniulat na nasakote ng militar sa magkahiwalay na lalawigan ng Palawan at Negros Oriental kamakalawa.

Isinasailalim sa imbestigasyon ang mga rebeldeng sina Arnel "Ka Bayok" Francisco, Dema Tutal, Aboy Abla at Heledrio Esong.

Sa naantalang ulat na nakarating kahapon sa Camp Aguinaldo, sina Francisco, Tutal at Abla ay nadakip bandang alas-8 ng umaga sa bisinidad ng Dumaguena Naara, Palawan habang nagsasagawa ng combat patrol ang militar.

Samantala, si Esong naman ay nalambat sa bayan ng Negros Oriental makaraang makatanggap ng impormasyon ang mga awtoridad na naglalakad ang rebelde sa mataong lugar. (Ulat ni Danilo Garcia)

Katiwala sa palaisdaan pinatay ng mandurugas

BACOOR, Cavite – Isang katiwala sa palaisdaan ang kumpirmadong napatay makaraang saksakin ng mandurugas dahil naaktuhan ng biktima na nanghuhuli ng hipon sa binabantayang fishpond sa Barangay Talaba 2 sa bayang ito kahapon ng umaga.

Dalawang saksak ng patalim sa katawan ang tumapos sa buhay ni Alfredo Sibido, 37, caretaker ng fishpond na pag-aari ni Taling Mateo.

Samantala, nakilala naman ang suspek na si Raul Cabahug na ngayon ay tinutugis ng pulis-Bacoor.

Sa inisyal na imbestigasyon ni SPO1 Rodolfo Arboleda, naitala ang krimen dakong alas-7 ng umaga matapos na magising ang biktima at maaktuhan ang suspek na nanghuhuli ng hipon. (Ulat ni Cristina Go-Timbang)

Dalaga nasermunan ng ina nag-suicide

GAPAN CITY, Nueva Ecija – Pinaniniwalaang pakikipagrelasyon sa may asawang lalaki at nasermunan ng ina ang naging ugat upang mag-suicide ang isang 21-anyos na dalaga sa kanilang bahay sa Barangay Capalangan sa lungsod na ito kamakalawa ng madaling-araw.

Ang bangkay ng biktima na nakabitin sa kisame ng natagpuan ng kapatid na si Ramil ay nakilalang si Mary Jane D. Lumanian.

Sa isinumiteng ulat kay P/Supt. Benjamin dela Cruz, hepe ng pulisya sa lungsod na ito, huling nakitang buhay ang biktima na sinesermunan ng ina dahil sa pakikipagrelasyon nito sa lalaking may asawa at simula noon ay dinamdam na ng dalaga ang ipinayo ng magulang kaya nagdesisyong magpakamatay. (Ulat ni Christian Ryan Sta. Ana)

Teacher tinodas ng mag-ama

MANDAON, Masbate – Sinaksak at pinagbabaril hanggang sa mapatay ang isang teacher na lalaki ng Debesmscat ng mag-ama makaraang bastusin ng biktima ang asawa ng suspek na ama habang magkasamang nag-iinuman ng alak sa Barangay Alas sa bayang ito kamakalawa ng gabi.

Lango pa sa alak ang napatay na biktimang si Rex San Buenaventura, 32, samantala, nadakip ng pulisya ang amang suspek na si Nicanor De Guzman, 37, habang tinutugis ang anak na si Richard De Guzman, 18.

Naitala ang krimen bandang alas-9 ng gabi matapos na bastusin ng biktima ang asawa ni Nicanor na ikinagalit naman ng kasambahay.

Napag-alaman sa ulat ng pulisya na hindi pinalagpas ng mga suspek na senglot ang ginawang pambabastos sa asawa kaya isinagawa ang krimen. (Ulat ni Ed Casulla)

Praning nag-amok napatay ng pulis

AMADEO, Cavite – Isang 25-anyos na lalaki na pinaniniwalaang may kapansanan sa pag-iisip ang iniulat na binaril at napatay ng nagrespondeng pulis makaraang mag-amok sa Barangay Dagatan sa bayang ito kamakalawa ng tanghali.

Dalawang tama ng baril sa mukha ang tumapos sa buhay ni Noel Haragan, binata. Samantala, ang nakabaril na pulis na nagtamo naman ng sugat sa ulo dahil sa tinaga ni Haragan ay nakilalang si SPO4 Ismael Salazar.

Naganap ang pangyayari dakong alas-12:45 ng tanghali matapos na makatanggap ng impormasyon ang mga tauhan ni P/Chief Insp. Redelino Aspiras na may nag-aamok na praning kaya kaagad namang nagresponde si Salazar upang mamagitan sa pangyayari.

Ngunit initak ang nagrespondeng pulis na ikinasugat naman nito ngunit nakuha niyang barilin ang nag-amok na si Haragan na ikinasawi nito. (Ulat ni Cristina Go-Timbang)