30 Abu Sayyaf sumuko

Umaabot sa tatlumpong kasapi ng Abu Sufia kidnap-for-ransom gang kabilang ang kanilang kumander na pinaniniwalaang kumalas sa grupo ng bandidong Abu Sayyaf ang nagpasyang sumuko sa mga awtoridad sa Sultan Kudarat makaraang mahintakutang mapatay sa isinasagawang sunud-sunod na operasyon ng militar at kapulisan sa Mindanao.

Payapang sumuko si Kumander Dido Binago, kasama ang 29 na tauhan nito sa kampo ng 7th Special Forces Battalion sa Brgy. Butril, Palimbang, Sultan Kudarat dakong alas-4 ng hapon.

Ayon sa ulat, ilang araw na pakikipagnegosasyon ng militar at lokal na opisyales ng naturang lalawigan kaya maayos na sumuko ang grupo ni Binago.

Inamin naman ni Binago na nahintakutan silang mapatay ng militar dahil sa pinaigting na operasyon laban sa kanila kaya nagpasya silang sumuko.

Ang grupo ni Binago ay pinaniniwalaang responsable sa pagdukot sa Koreanong treasure hunter na si Jae Kwoon Yoon at hotel owner na si Carlos Belonio na pawang napalaya na. (Ulat ni Danilo Garcia)