3 puga nadakip

MALITA, Davao del Sur – Hindi nagtagal ang pansamantalang kalayaang natamo ng tatlong kilabot na takas na preso matapos na muling madakip sa isinagawang magkasunod na operasyon ng pulisya, kamakalawa.

Kinilala ang mga balik-bilangguan na sina Gordon Congo, may kasong robbery with attempted multiple homicide; Dionesio Culas, nahaharap sa kasong pagnanakaw at Manuel Balco, may kasong paglabag sa PD 533.

Base sa ulat na nakarating sa Camp Crame, unang naaresto ng mga tauhan ng Malita Bureau of Jail Management and Penology (BJMP) ang suspek na si Congo sa Sicalig, Brgy. Bulila, Malita dakong alas-2:30 ng hapon.

Dakong alas-9:30 ng umaga naman kinabukasan, naaresto ng mga awtoridad ang dalawa pang takas na preso sa Little Baguio, Malita, Davao del Sur. (Ulat ni Danilo Garcia)