4 patay, mayor ligtas sa flash flood

ZAMBOANGA, Sibugay – Naging trahedya ang pagdiriwang ng kapistahan ni San Juan Bautista matapos na mamatay sa pagkalunod ang isang opisyal ng bayan ng Imelda pati na rin ang tatlong residente sa isang flash flood, kamakalawa ng hapon.

Sa ulat na ipinarating sa Camp Crame, nakilala ang mga nasawi na sina Cornelia Lagutin, municipal agriculturist sa bayan ng Imelda; Emedio Larino, kagawad ng Brgy. Poblacion, Imelda at Aruela Arayata at isang nakilala sa pangalang Tony Bato.

Patuloy namang pinaghahanap pa ng mga rescue teams ang dalawa pang empleyado ng nabanggit na munisipyo na natangay rin ng baha na sina Adelaida Etorig at Tony Sarabia.

Nabatid na naliligo dakong alas-3 ng hapon si Imelda Mayor Juanito Gonzales at kanyang buong staff sa munisipyo at mga residente ng Brgy. Poblacion sa Baluran river nang biglang rumagasa ang tone-toneladang tubig buhat sa isang talon.

Hindi na nagawang makaiwas ng mga biktima dahil sa dambuhalang agos ng tubig.

Masuwerte namang naagapan ng kanyang mga tauhan si Mayor Gonzales nang agad itong naiahon at mailayo sa ilog. (Ulat ni Danilo Garcia)