Si M/Sgt. Marcelino Cadabona, 50, na nakatalaga sa 74th Infantry Battalion ay tinambangan at napatay sa harap mismo ng kanyang asawa, samantala, napatay naman ng mga miyembro ng PNP-Special Weapon And Tactics (SWAT) ang isa sa tatlong killer na si Roberto Lagris, alyas Bobby ng Brgy. Cotta.
Nadakip naman ng pulisya si Rogelio Galicia, 60 at kasalukuyang tinutugis ang kasamang si Dante Panganiban sa hindi isiniwalat na lugar.
Base sa imbestigasyon ni SPO3 Marcelino Uy, naganap ang krimen bandang alas-10 ng umaga habang bumababa ng pampasaherong dyip ang mag-asawa.
Patraydor na nilapitan ni Galicia ang biktima saka pinaputukan ng malapitan ngunit hindi naman sinaktan ang asawa ng sundalo.
Nagkataon namang nagpapatrolya ang grupo ng PNP-SWAT sa kinaganapan ng krimen kaya kaagad namang nadakip si Galicia sa maikling habulan.
Habang sinisiyasat si Galicia ay ikinanta nito ang pinagkukutaan ng dalawa pa nitong kasamahan kaya mabilis na tinungo ng mga awtoridad ngunit sinalubong sila ng sunud-sunod na putok kaya gumanti naman ang pulisya na ikinasawi ni Lagris, samantala, si Panganiban ay kaagad na nakalayo sa naturang lugar.
Napag-alaman na si Sarhento Cabadona ay inambus na noong nakaraang buwan sa Tayabas Coliseum ngunit nagtamo lamang ng sugat sa balikat.
Inaalam naman ng pulisya ang pinaka-utak ng krimen na pinalalagay na nakabangga ng biktima sa hindi maipaliwanag na dahilan. (Ulat ni Tony Sandoval)