3 ‘Akyat-Bahay Gang’ todas sa pakikipagbarilan sa pulis

BACOOR, Cavite – Napatay sa pakikipagbarilan ang tatlong kilabot na "Akyat-Bahay Gang" ng mga kagawad ng pulisya makaraang makorner sa panulukan ng Addas 2 Subd. at Molino Road 2 ng bayang ito dakong alas-8:30 ng gabi kamakalawa.

Kasalukuyan pang bineberipika ng pulisya ang mga pangalan ng tatlong napatay na pinaniniwalaang mula sa karatig pook at dumayo upang mandugas ng tricycle at pumasok sa mga bahay sa iba’t ibang subdivision sa nabanggit na barangay.

Ayon sa ulat ng pulisya na isinumite kay P/Sr. Insp. Alberto Capua, hepe ng pulisya sa bayang ito, narekober sa mga suspek ang kinulimbat na Yamaha trike (TJ-3371) na pag-aari ni Reynante Estrada; 2 baril, granada at hindi pa mabatid na halaga ng mga ari-arian at alahas na nadugas sa bahay ni Versoza Daroy ng St. Ann St. Addas 2 ng naturang lugar. (Ulat ni Cristina Go-Timbang)