21 Intsik nasabat sa karagatan ng Palawan

CAMP VICENTE LIM, Laguna–Umaabot sa dalawampu’t-isang Intsik na iligal na pumasok sa bansa ang dinakip ng pinagsanib na puwersa ng Palawan PNP at 412nd Provincial Mobile Group sa karagatan ng sakop ng isla ng Lumbugan at Mangsee sa Balabac, Palawan.

Kinilala ng mga awtoridad ang mga nadakip na Chinese nationals na sina Lin Ci Ping, Huang Hai, Xi De Jin, Feng dQi Shin, Xi Deng Kao, Zen Clao, Zhen Fan Zing, Lin Dao Fang, Bang Ga Hin, Chen Zin Be, He Jing Neng, Li Xin Zu, Ding Zhi Quan, Li Xeng, Chen Xeng, Wu Jai Fung, Liang Di, Wei Qin Zin, Chen Jin Xiong, Huang Kin Qiao at Fu Hen Shen.

Ang mga nadakip na Intsik ay lulan ng fishing boat na may markang Xiong Hai 2078 na naglalayag at nakapasok na sa teritoryo ng bansa.

Base sa ulat ni P/Chief Insp. Alejo Acosta, hepe ng Balabac PNP station, tinangka pang manuhol ng halagang US$ 300 ang mga nasabat na Intsik subalit isinagawa pa rin ng mga awtoridad ang pagdakip.

Napag-alaman pa sa ulat ng pulisya na matapos na mamataan ang fishing boat ng mga nasabat na Chinese national ay may nakita rin ang mga awtoridad na isa pang barkong may lulang mga Intsik subalit mabilis na tumakas papalayo sa naturang karagatan. (Ulat ni Ed Amoroso)