War games binisita ni Guingona

SUBIC BAY FREEPORT – Bumisita kamakalawa si Vice-President at Department of Foreign Affairs (DFA) Secretary Teofisto Guingona sa Subic Bay upang personal na saksihan ang isinagawang joint military exercises sa pagitan ng US at Philippine troops sa bansa.

Personal din na sinalubong ni Subic Bay Metropolitan Authority (SBMA) Chairman Felicito Payumo ang pagdating ni Guingona sa Subic Bay International Airport.

Nagsagawa ng "On-the-beach" tactical exercises ang 12-man team mula sa elite forces ng US Navy Seals at ng Special Warfare Group (SWAG) ng Philippine Navy sa dalampasigan ng Dungaree Beach sa Subic Bay Freeport na kapwa armado ng M-16 armalite riffles, smoke bombs at mga supistikadong communication devices.

Ayon naman sa mga opisyal ng Visiting Forces Agreement Commission (VFACOM) na ang 10-minutong live firing war games ng Amerika ay nagpapakita lamang na eksperto sa larangan ng tactical move at rescue operations laban sa mga terorista.

Maliban kay Guingona ay sinaksihan din ni US Embassy Media Affairs chief Michael Anderson at ilang miyembro ng media ang naturang war exercise sa Subic.

Aabot sa 1,200 US Navy contingents ang lumahok sa taunang joint military exercises na ginaganap sa bansa kasama ang ilang Filipino counterparts sa ilalim ng Visiting Forces Agreement (VFA). (Ulat ni Jeff Tombado)