Pistang bayan tangkang isabotahe, itinanim na bomba pumalpak

CANDELARIA, Quezon – Tinangkang isabotahe ng hindi nakikilalang grupo ang pagdaraos ng pistang bayan dito sa pamamagitan nang paglalagay ng bomba sa isang bakanteng lote, subalit sa kabutihang palad ay hindi sumabog dahil sa kakulangan ng sapat na kaalaman ng gumawa nito.

Ayon kay Chief Inspector Armando Dolor, kung sumabog lamang ang naturang bomba ay tiyak na maraming mamamatay sa lugar na kinatagpuan nito.

Ang bomba na nakalagay sa isang kahon ay kahalintulad ng mga bombang ginagamit ng grupo ng terorista na may timer at may electricwire, subalit ang kaibahan nito ay sa gasolina imbes na sa dinamita ikinabit ang wire.

Binanggit sa report na natagpuan ang bomba dakong alas- 5 ng umaga sa compound ng Candelaria Municipal hall na may limang metro lamang ang layo sa mataong lugar na doon itinayo ang mga kubol ng mga paninda.

May hinala ang pulisya na ang grupong sangkot dito ay maaaring yaong hindi napagbigyan na maglagay ng kanilang puwesto ng paninda sa kalye. (Ulat ni Tony Sandoval)