Asset ng reporters tiklo sa kotong

OLONGAPO CITY – Isa umanong asset ng isang reporter ng isang pang-umagang pahayagan ang nadakip kamakalawa ng gabi ng pinagsanib na puwersa ng Law Enforcement Department (LED) at ng Intelligence and Investigation Office (IIO) ng Subic Bay Metropolitan Authority (SBMA) matapos na maaktuhang nangongotong sa bawat tindahan sa loob ng Subic Bay Freeport.

Sa ulat ng nasabing pulisya, kinilala ang suspect na si Lamberto Pacheco, 57, isa umanong asset ng tabloid reporter (hindi ang PSN).

Ayon sa ulat ng pulisya, nadakip ang suspect habang nasa aktong nangongotong sa bawat tindahan na nakapuwesto sa Night Bazaar na inorganisa ng Freeport Service Corporation (FSC), isang subsidiary ng Subic Bay Metropolitan Authority (SBMA).

Mabilis na dinala ang suspect sa tanggapan ng Intelligence and Investigation Office (IIO) upang kuwestiyunin at upang panagutin sa nasabing insidente kasabay nang pagdumog ng mahigit sa 30 stall owners sa nabanggit na tanggapan upang magsampa ng reklamo laban din sa pangongotong sa kanila ng suspect.

Ayon naman kay Jemael Disoma, 23, residente ng 31 Arthur St., West Bajac-Bajac, Olongapo City at isa sa mga nagsampa ng reklamo sa pulisya, tuwing gabi umano kumokolekta ang naturag suspect sa bawat tindahan na umaabot sa halagang P8,000 kada gabi. (Ulat ni Jeff Tombado)