4 katao sugatan sa pagsabog sa Tondo
MANILA, Philippines — Apat na mangangalakal ang malubhang nasugatan sa naganap na pagsabog sa kanto ng Dagupan at Tayuman Sts., sa Tondo, Maynila, kahapon ng hapon.
Inilarawan ng isang medic na rumesponde na ang isa sa mga biktima ay naputol ang kamay at lumabas na ang buto habang ang isa ay butas ang pisngi at nasugatan ang babang parte ng katawan.
Sa ulat ng District Explosive and Canine Unit (DECU) ng Manila Police District (MPD), alas-2:30 ng hapon nang maganap ang pagsabog sa nasabing lugar.
Sa pahayag ng Barangay Kagawad na si Nino Cervantes, 45, ng Barangay 54, sa Tondo, sa pulisya, nabatid na nangangalakal ang mga biktima nang maisipan nilang i-dismantle o kalasin ang isang hindi pa batid na bagay, na tila compressor umano ng aircon, sanhi upang sumabog ito.
Dinala na sa Jose Reyes Memorial Medical Center ang mga biktima na umano’y pawang mga may malay.
- Latest
