Ex-Cabinet official namagitan sa illegal POGOs - PAGCOR
MANILA, Philippines — Ibinunyag ng Philippine Amusement and Gaming Corp. (PAGCOR) na isang dating Cabinet official ang umano’y nagsisilbing protektor at nagtangkang mamagitan sa mga illegal na Philippine Offshore Gaming Operators (POGOs) na ni-raid kamakailan ng mga awtoridad.
Batay sa pahayag na inilabas ni Pagcor Chairman at Chief Executive Officer Alejandro Tengco, hinihikayat nito sa mga awtoridad na imbestigahan ang umano’y partisipasyon ng dating government official sa pagbibigay ng lisensiya sa mga POGO operators na may kuwestionable ang backgrounds.
Hindi muna binanggit ni Tengco ang pangalan ng dating government official subalit tiniyak nito na ilulutang niya ito sa tamang lugar at kung paano kumalat at lumaki ang illegal na offshore gaming operations.
Kailangan na lumabas ang katotohanan kung paano nabigyan ng lisensiya o permit ang nasa 298 POGO dahil nasa 43 lamang ang may lisensiya.
“As a regulator, it is our mandate to ensure that only those with valid licenses are allowed to operate all forms of gambling and gaming activities, whether these are land-based casinos or online platforms,” ani Tengco.
Dagdag pa ni Tengco, tungkulin ng gobyerno na walisin ang mga illegal na gawain kabilang ang illegal operators at mga “backers” nito dahil nagdadala ito ng malaking banta sa bansa.
- Latest
