Pagtaas ng multa sa illegal parking pinatigil ni Marcos

MANILA, Philippines — Ipinatigil ni Pangulong Ferdinand Marcos Jr. ang pagtataas ng multa  para sa mga illegal parking.

Sa social media post ni Pangulong Marcos, sinabi niyang hindi niya pinayagan ang Joint Traffic Circular No. 01 ng Metro Manila Council tungkol sa probisyon na taasan ang multa sa illegal parking na kung saan mula sa P1,000 ay gagawing P4,000.

“Para patuloy ang magandang serbisyo ng ating pamahalaan ay hindi ko pinayagan ang Joint Traffic Circular No. 01 ng Metro Manila Council tungkol sa probisyon na tataasan ang multa para sa mga illegal parking mula sa isang libong piso na hanggang apat na libong piso maiiwan na sa isang libong piso lamang,” ayon sa presidente.

Bagama’t naniniwala naman si Pangulong Marcos sa intensyon ng panukala, napagdesisyunan niya na gawing prayoridad ang pagdisiplina kaysa sa pagmumulta dahil ang Bagong Pilipino ay disiplinado.

Sa pamamagitan anya ng pagtutok sa individual responsibilty ay makakapagtatag ng pangmatagalang solusyon sa mga hamon sa trapiko.