Estudyante naligo sa ilog, nalunod
MANILA, Philippines — Isang estudyante ang nalunod matapos na mapadpad sa malalim na bahagi ng ilog sa Rodriguez, Rizal, habang naliligo kasama ang mga kaklase, kamakalawa.
Patay na ang biktimang si Sherwin James Monleon nang matagpuan ng rescue team, alas-10:35 ng gabi kamakalawa.
Sa ulat ng Rodriguez Municipal Police Station, alas-2:40 ng hapon nang maganap ang insidente sa Wawa River, Sitio Katwiran, Brgy. San Rafael, sa Rodriguez.
Nauna rito, nagkayayaan ang biktima at kanyang mga kaklase na magpiknik at maligo sa ilog.
Gayunman, habang naliligo ay napadpad umano ang biktima sa malalim na bahagi ng ilog at tuluyang inanod ng malakas na agos patungo sa gitna ng ilog.
Nakita naman umano ng mga kasamahan ng biktima ang pangyayari kaya’t kaagad na humingi ng tulong. Kaagad na nagkasa ng search and rescue ang mga otoridad ngunit bigo silang maisalba ang biktima.
- Latest
