Fishing ban planong ipatupad ni Marcos

Sagot sa problema sa overfishing

MANILA, Philippines — Para matugunan ang problema sa overfishing at maparami ang fish population at aquaculture sa bansa ay plano ng pamahalaan na magpatupad ng fishing ban at iba pang mga hakbang.

Sinabi ito ni Pangulong Ferdinand R. Marcos Jr. bilang bahagi ng mga hakbang ng pamahalaan upang matiyak ang pagkakaroon ng sapat na suplay ng isda sa bansa.

“Kung minsan kaila­ngan ‘wag uubusin yung isda para sa next season mayroon pa. Kaya yun yung tinitingnan natin ngayon,” ayon sa pangulo.

Sinabi ng pangulo na mayroong mga lugar na hindi dapat gawin palaisdaan dahil ang mga ito para sa breeding o pagpapadami ng mga isda.

Ayon sa pangulo, ang pag-develop ng agrikultura sa bansa ay hindi nakasentro lamang sa suplay ng bigas at mais kundi maging sa pagpapabuti ng fishery at livestock sectors.

“Kaya’t kasama sa ating development plan ang mga fisheries dahil nang bumaba ang dalawang bagay: bumababa ang ating nahuhuli, ng ating mga mangingisda dahil nasira na ‘yung mga kung saan pinalalaki ang mga isda,” dagdag pa ng pa­ngulo.

Sinabi ng pangulo na magpapatupad din ng mga programa ang adminis­trasyon hinggil sa pagpapatayo ng mas maraming cold storage facilities upang ma­iwasan ang pagkasira ng mga produkto.

Sa mga maliiit naman na bagsakan ng isda ay maglalaan ang gobyerno ng pagawaan ng yelo upang magamit ng mga mangi­ngisda.