SUV driver na sumagasa sa sekyu, sumipot na sa piskalya

MANILA, Philippines — Sumipot na kahapon at naghain ng counter affidavit sa piskalya ang driver ng sports utility vehicle (SUV) na sangkot sa viral hit-and-run incident sa Mandaluyong City ­kamakailan.

Nagtungo kahapon si Jose Antonio Sanvicente sa Mandaluyong City Prosecutor’s Office upang dumalo sa preliminary investigation hearing sa kaso sa paghahain ng kanyang counter-affidavit ng kanyang abogadong si Atty. Danny Macalino.

Hindi naman nakadalo sa pagdinig ang biktimang si Christian Floralde, na kinatawan na lamang ng kanyang abogadong si Atty. ­Federico Biolena.

Matatandaang si Sanvicente ay sinampahan ng kasong frustrated murder at abandonment of one’s own victim kaugnay nang ginawang pananagasa at pag-abandona kay Floralde noong Hunyo 5.

Kumpiyansa naman si Atty. Biolena na papabor sa kanila ang desisyon ng prosecutors dahil malakas ang ebidensiya nila laban sa suspek.