Ginang na kagawad itinumba
MANILA, Philippines — Namatay habang dinadala sa ospital ang isang 55-anyos na ginang na isang barangay kagawad nang ito ay pagbabarilin ng dalawang lalaki sa loob ng kanyang bahay sa Quezon City, kamakalawa ng gabi.
Ang nasawi dahil sa mga tama ng bala sa iba’t ibang bahagi ng katawan ay nakilalang si Noemi Balderama-Agcaolili, 55, may-asawa, kagawad ng Brgy. Lipunan, residente ng No. 303-E. Boni Serano, Bagong Barrio ng nasabing barangay.
Sa imbestigasyon, bago nangyari ang krimen, dakong alas-8:30 ng gabi sa loob ng tahanan nito ay isang testigo ang nakakita na pumarada ang isang motorsiklo lulan ang dalawang lalaki sa bahay ng biktima.
Pumasok sa tahanan ng kagawad ang mga suspek at doon ay nakarinig na umano siya ng sunud-sunod na putok ng baril.
Ilang sandali ay mabilis na lumabas ang mga salarin at sumakay sa dalang motorsiklo saka tumakas.
Isinugod ang duguang misis sa Cardinal Santos Medical Center,subalit binawian din ito ng buhay bandang alas-10:02 ng gabi.
- Latest
