SUV nahulog mula sa 3rd floor parking space ng mall

MANILA, Philippines — Isang 83-anyos na biyenan ni Senator Grace Poe-Llamanzares ang nasugatan matapos mahulog mula sa ikatlong palapag ng parking space ng isang shopping mall ang minamaneho nitong sport utility vehicle (SUV) kahapon ng umaga sa Greenhills, San Juan City.

Ginagamot ngayon sa Cardinal Santos Medical Center ang biktima si Dr. Teodoro Paraiso Llamanzares, residente ng Nevada St., Northeast Greenhills, San Juan City.

Sa ulat ng pulisya,bago naganap ang aksidente dakong alas-9:45 ng umaga sa aksidente sa third level ng Parking 4, na matatagpuan sa harapan ng Greenhills shopping mall, Promenade, Barangay Greenhills ay sakay ang biktima ng itim na Toyota Innova (AHA-8024).

Paparada pa lamang sana nang bigla na lang umarangkada ang sasakyan nito, hanggang sa tuluyang lumusot sa bakal na railing ng parking space at nahulog sa kalsada sa harapan ng mall.

Unang tumama ang unahang bahagi ng sasakyan saka ito tumihaya at nagkayupi-yupi.

Kaagad namang rumesponde ang mga tauhan ng San Juan Police Community Precinct 1 (PCP-1) at management ng mall at isinugod sa pagamutan ang biktima.