Intsik tiklo sa P50-M drug bust
MANILA, Philippines - Nadakip ng mga otoridad ang isang 38-anyos na Intsik na pinaghihinalaang drug trafficker at nasamsam dito ang nasa 10 kilo ng shabu na nagkakahalaga ng P50M sa isinagawang buy bust operation sa San Juan City kamakalawa ng gabi.
Ang nasakoteng suspek ay kinilalang si Jinfa Wang, tubong Fujian, China at naninirahan sa Ongpin St., Binondo, Manila.
Ayon kay Chief Inspector Roberto Razon Sr., hepe ng Regional Anti-Illegal Drugs-Special Operations Task Group (RAID-SOTG) ng National Capital Region Police Office (NCRPO) bandang alas-11:30 ng gabi nang magsagawa ng buy bust operation ang kanilang mga tauhan sa harapan ng Shopsville at McDonalds food chain malapit sa Viramall Greenhills, Brgy. Greenhills, San Juan City at dito ay nasakote si Wang matapos itong magbenta ng 10 kilo ng shabu sa poseur buyer ng RAID-SOTG.
Nakumpiska rin sa suspek ang isang kulay itim na Toyota Innova na may conduction sticker na YW 7571.
Nabatid na dalawang linggo ang isinagawang surveillance operations laban kay Wang matapos silang makatanggap ng impormasyon sa talamak nitong pagbebenta ng illegal na droga.
- Latest
