Modus ng NPA tuwing eleksyon... AFP tututok sa ‘permit to campaign’, ‘permit to win’

MANILA, Philippines – Dahil sa nalalapit na ang 2016 elections ay tututukan na ng Armed Forces of the Philippines (AFP) ang modus operandi ng New People’s Army (NPA) na ‘permit to campaign’ at ‘permit to win’ laban sa mga kandidatong kinokotongan ng mga ito.

Ito ang sinabi ni AFP Chief of Staff Gen. Hernando Delfin Carmelo Iriberri kaya’t nasa pro­seso na sila nang pango­ngolekta ng impormasyon at patuloy na monitoring laban sa illegal na aktibidades ng mga rebelde lalo na kapag nalalapit na ang halalan.

Sa tala  ng AFP kinokotongan ng mga rebelde ang mga kandidato tulad na ng mga tumatakbong gobernador na hinihingan ng P500,000; bise gobernador; P300,000; kongresista P250,000 hanggang P300,000; bokal P200,000; ma­yor P100,000 hanggang  P200,000; bise mayor P100,000 na iniimplementa ng communist groups sa tuwing sasapit ang election.

Inoobliga ng mga rebelde ang mga pulitiko o kandidato na magbayad sa nasabing halaga.

Ang modus operandi ng permit to campaign ay  kapag hindi nagbayad ang kandidato ay isasabotahe ang panga­ngampanya ng mga ito sa kanilang mga balwarteng teritoryo.

Habang ang  ‘permit to win’ ay may banta ng  pag­likida sa kalaban o takutin ng mga armadong rebelde, kidnapping at iba pa hanggang sa mapilitang iatras ang kandidatura.