13th month bonus ng empleyado, naholdap

MANILA, Philippines - Umaabot sa P28,000 na 13th month bonus ng isang accounting analyst ang natangay ng riding-in-tandem suspects nang siya ay holdapin at barilin kamakalawa sa Caloocan City.

Ang biktima na nakaratay sa Manila Central University Hospital dahil sa tinamong  tama ng bala sa braso at leeg ay kinilalang si Renz Bernal 26-anyos, binata, Sta. Quiteria, ng naturang lungsod.

Sa ulat ng dakong alas-2:45 ng madaling araw sa may Rivera Street, Brgy. 163 Sta. Quiteria ay papauwi na sa kanyang bahay ang biktima mula sa trabaho nang harangin ng dalawang salarin na magkaangkas sa isang motorsiklo at nagdeklara ng holdap.

 Pumalag ang biktima kaya’t pinaputukan ito ng mga suspek at  natangay ang  kanyang iPhone 5S, P28,000 na 13th month bonus.