Bagets na pumatay ng ginang sa CamSur, tiklo sa Taguig

MANILA, Philippines – Pagkalipas ng anim na araw nang gawin ng isang 15-anyos na binatilyo ang pagpatay sa isang 33-anyos na ginang sa Camarines Sur noong Oktubre 16, ay nadakip ito ng mga otoridad kahapon ng madaling-araw sa Taguig City.

Ang suspek na itinago ang pangalan dahil sa pagi­ging menor de edad ay suspek sa pagpatay sa biktimang si Alicia Atanacio, may-asawa ng Pinamaniquian, Ligao City na nadiskubreng patay sa loob ng Ju-Al Café Bar, Brgy Paloyon,  Nabua, Camarines Sur, dakong alas-7:30 ng umaga noong October 16, 2014.

Sa ulat ng Taguig City police, alas-12:00 ng mada­ling araw nang madakip ang suspek sa Barangay Bicutan dahil sa paglabag nito ng curfew.

Habang iniimbestigahan ay nadiskubre ng mga pulis na sangkot ito sa pagpatay at pagnanakaw sa biktima na nagtamo ng apat na saksak.

Matapos gawin ang krimen ay tumakas ang binatilyo at nagtungo sa Taguig para magtago.

Ang binatilyo ay kinasuhan na ng murder ng piskalya ng Naga City prosecutor.